Pagdiriwang ng Buwan ng Wikang Pambansa sa Kagawaran ng ECE

Ang Wikang Pambansa ay taon-taong ginugunita ng bawat mamamayan ng bansang Pilipinas tuwing buwan ng Agosto kaya naman hindi nagpahuli ang Kagawaran ng Panimulang Edukasyong Pambata (Early Childhood Department) ng St. Peter the Apostle School sa pagdiriwang nito.

Upang masigurado ang kaligtasan at kalusugan ng bawat mag-aaral, ang pagdiriwang ay ginanap sa dalawang magkahiwalay na araw na may nakatakdang iba’t ibang oras ng programa para sa bawat seksyon ng Nursery 1, Nursery 2, at Kinder. Ang pagdiriwang ng Buwan ng Wikang Pambansa sa taong ito ay may temang “Filipino at mga Katutubong Wika: Kasangkapan sa Pagtuklas at Paglikha”. Ang palatuntunan ay sinimulan ng tagapagsalita na si Bb. Clarisse B. Tepora, guro sa Nursery 1 at Kinder, sa pamamagitan ng pagtawag sa mga mag-aaral upang iparada ang kanilang mga suot na pambansang kasuotan ng Pilipinas. Sinundan ito ng pagbibigay pugay sa mga mahalagang panauhin mula sa administrasyon at mga opisyal ng SPASPA kasama ang ilang mga kinatawan sa bawat antas.

Ang Pambungad na Panalangin ay pinamunuan ng kinatawan ng bawat antas kasunod ang sabay-sabay na pag-awit ng Lupang Hinirang. Ang mga layunin kung bakit ipinagdiriwang ang Buwan ng Wika ay ipinahayag ni Gng. Leila M. Baltazar, “Early Childhood Education Coordinator” sa kanyang panimulang mensahe. Ayon sa kanya, ang Buwan ng Wika ay ating ipinagdiriwang upang alalahanin ang kasaysayan, kilalanin, panatilihin at paunlarin ang Wikang Filipino. Ipinagdiriwang din ito bilang pagsaludo at pagmamahal sa ating wikang pambansa at pasasalamat sa tinagurian at kinikilalang ama ng wikang pambansa na si Manuel Luis Quezon.

Pinamunuan din ni Gng. Baltazar ang sabay-sabay na pag-awit at paglapat ng makahulugang interpretasyon sa awiting “Ako ay Pilipino”. Tunay ngang kahanga-hanga ang partisipasyon ng lahat dahil bukod sa mga mag-aaral at guro, ang mga magulang, mga nakatatanda, at mga panauhin ay sumabay rin sa pag-awit at paglapat ng interpretasyon sa nasabing awit.

Nakalulugod din ang aktibong pakikilahok ng bawat bata at magulang sa mga gawaing kaugnay ng Buwan ng Wikang Pambansa. Kaya naman, taas-noong ipinamalas ng mga mag-aaral mula sa Nursery 1 hanggang sa Kindergarten ang kanilang mga talento sa pagtula at sa lahatang pagsayaw.

Higit pang naging masigla ang paggunita ng Buwang ng Wikang Pambansa dahil sa mga inihandang palarong pinoy ng mga guro para sa mga mag-aaral at kanilang mga magulang. Sa pagtatapos ng palatuntunan, mababakas sa lahat ang kasiyahan dahil na rin sa mga palaro at sa mga natanggap na premyo ng bawat mag-aaral.

Ang pagdiriwang ng Buwan ng Wikang Pambansa ay nagtapos sa isang panalangin na pinamunuan ni Bb. Charlize Dwayne Sablada. Bago umuwi, ang lahat ay inanyayahang kumuha ng mga dinala nilang pagkaing Pilipino katulad ng biko, suman, puto, kutsinta, pichi-pichi, at marami pang iba upang sa kanilang pag-uwi ay mayroon silang pagsaluhan.. Ang ibang mga pagkain ay bukas-palad na ibinahagi sa mga kapatid nating makikita sa gilid ng kalye malapit sa paaralan..

Sa ginanap na simpleng palatuntunan, muli na namang napaalalahanan ang lahat na ang Wikang Filipino ay buhay at mananatiling buhay.